Нарэшце, мы гатовыя пра гэта сказаць: каманда Літрадыё распачынае выдавецкі праект!
Як кажа яго галоўны ідэолаг Павел Анціпаў, “мы будзем друкаваць тое, чаго, кажуць, няма, — новую беларускую літаратуру”. Вядомых і невядомых аўтараў і аўтарак, новыя кніжкі. І перавыдаваць з нулявых, дзясятых і дваццатых тэксты, якія былі і ўжо няма. Хутка, якасна, суб’ектыўна.
З лёгкай рукі Валянціна Акудовіча пачынаем: яго “Мяне няма” — наша першае выданне. Замаўляйце тут — з дастаўкай ці без. І падпісвайцеся на нас таксама: telegram, facebook, instagram.
Стартуем на энтузіязме, але верым, што вы любіце чытаць (і пісаць таксама).
Падрабязней
“Мяне Няма” — незалежнае выдавецтва. Друкуем сучасных беларускіх пісьменнікаў. Проза, паэзія, эсэістыка і іншыя мастацкія жанры. Белліт без лімітаў і цэнзуры.
Назва выдавецтва пазычана (з дазволу аўтара) з кнігі Валянціна Акудовіча “Мяне няма: роздумы на руінах чалавека”. І гэта абсалютна невыпадкова.
Па-першае, Акудовіч вядомы як зорны патрон беларускіх культурніцкіх ініцыятыў. Ён быў хросным бацькам “Бум-Бам-Літу”. Пад яго наглядам выдаваўся часопіс “Паміж” Беларускага Калегіюма. Ён як рэдактар выправіў у жыццё мноства дэбютных кніжак маладых аўтараў і працаваў з моладдзю як ментар.
Па-другое, ягоная ідэя “Мяне няма” можа быць экстрапаляваная на ўсё беларускае. У тым ліку і на літаратуру. Мы ўспрымаем сваё толькі, калі яно становіцца чужым, тое, што было нам блізкім мы ўспрымаем толькі тады, калі яно становіцца далёкім. Парадаксальная ідэя Акудовіча ў тым, каб ухапіць нашу сутнаcць праз адсутнасць. Вызначыцца са сваім (не)існаваннем.
Беларусам так доўга казалі, што іх няма, што ўся гісторыя на нашых тэрыторыях тычыцца іншых нацый, што мы нібыта пагадзіліся з гэтым. І пачалі існаваць у прысутнасці адсутнасці.
Тое ж з нашай літаратурай. Яна, нібыта ёсць: тэксты пішуцца, кніжкі выдаюцца, выдаўцы шчыруюць. Але праходзіць 10 год і нідзе не знайсці ані тых кніжак, ані тых аўтараў, крамак як не было і ўсе выдавецтвы зачыненыя. Што адбываецца? Sweet Nothing. Салодкае Анічога.
Дао белліту — гэта нябачныя райтары, патаемныя сэнсы і спевы ў фортку.
